من أول ما بدأنا في سنة 2007 ولحد دلوقتي.. 10 سنين حاولنا فيها نحقق حلمنا في تنمية وتطوير الإنسان في كل مجال ممكن، وبكل مشروع نقدر نقدم بيه خدمة تغير حال حد محتاج ومستحق للمساعدة.. سواء كانت خدمة علاجية بنقدمها لمريض، أو فك كرب غارم محتاج مساعدة عشان يتخلص من الديون، أو فرصة تعليم لطالب في مدرسة من مدارس مصر الخير المجتمعية، أو غيرها كتير من مجالات انتو كان ليكو الفضل في المشاركة فيها والمساعدة لمؤسسة مصر الخير عشان تقدر توعد وتوفي.. وتوصل النهارده لأكتر من 28,706,724 خدمة مباشرة تم تقديمها في جميع محافظات وقرى مصر.

وفي واحد من أكتر برامج مؤسسة مصر الخير تأثيراً واللي بيغير حياة كتير مش بس المستحقين بشكل مباشر، هو برنامج الغارمين.. كل غارم بيخرج وبيرجع لأهله حياة جديدة بتنوّر البيت من تاني. ومؤسسة مصر الخير كمان بتساعد الغارمين عن طريق مشروع أبيس للسجاد اليدوي بإنهم يتعلموا حرفة يقدروا بيها يوفروا دخل شهري مناسب ليهم.

بفضل زكاتكو وتبرعاتكو قدرنا نخرّج في النص الأول من السنة دي 7700 غارم وغارمة.. ولسه هدفنا نوصل لـ 10,000 غارم يخرج من السجن قبل نهاية السنة دي.

ووفرت مصانع أبيس للسجاد اليدوي فرص عمل لـ 500 أسرة مصرية بمتوسط 5 أفراد للأسرة.. يعني فيه 2500 فرد قدروا يحققوا فرق في حياتهم من خلال الزكاة اللي اخترت مؤسسة مصر الخير عشان تقدر توصلها لأهلها ومستحقيها.

وكمان في مشروع المياه قدرت توصّل بمساهمتك وتبرعاتك الميه لأكتر من قرية وناس كتير الميه مش متوفرة عندهم، أو بتوصلهم ملوثة أو بتقطّع بشكل متكرر يومياً.

بمساهمتكو.. قدرنا نوفّر محطة تحلية مياه وصلّت المياه لـ 19,700 فرد في قرية عبد الله بك، ووفرنا خدمات الصرف الصحي لـ 5000 بيت في محافظة سوهاج، ووصلنا وصلات مياه 160 بيت قدر يوفّر المياه لـ 800 فرد. وكمان مدينا خطوط وشبكات ميه وصلت المياه لـ 5180 بيت في الأقصر.

وفي حملة إفطار رمضان السنة دي.. حملة إفطار 5 مليون صائم. وفرنا نص مليون وجبة ساخنة في خيم مؤسسة مصر الخير اللي وصل عددها لـ 41 خيمة في 22 محافظة في مصر. وكمان وصلنا لحلايب وشلاتين وكنا هناك لمدة 3 أيام، ووزعنا خلالها 1560 وجبة ساخنة لإفطار الصائمين في رمضان.

وفي رمضان.. كنا مع كل حد مسافر في طريقه في محطات القطر والأتوبيس وعلى الطرق السريعة، وقدرنا نوزّع أكتر من 450,000 وجبة إفطار مسافر. وكمان وزّعنا 300,000 كرتونة مواد غذائية (23 كيلو) على أسر المستحقين.

وفي قطاع التعليم في مؤسسة مصر الخير.. وتحديدًا في مدارس مصر الخير المجتمعية، واللي يعتبر من أهم مشروعات المؤسسة وأكبرها تأثيراً في التعليم بشكل مختلف يوفّر مدارس قريبة من أولادنا في كل قرية.. قدرنا نبني 107 مدرسة مجتمعية جديدة بتوفّر فرصة التعليم لـ 2836 طفل.

وبدأنا في تشغيل 898 مدرسة مجتمعية بتعلّم دلوقتي 24194 طالب.. وكمان بدأنا التوسّع أكتر في محافظة مطروح والعدد الإجمالي لمدارس مصر الخير المجتمعية هناك 93 مدرسة.

كل ده وأكتر كان في النص الأول من السنة دي.. وباستمرار جهودكم ودعمكم لمؤسسة مصر الخير مكملين وهنقدر نحقق أهدافنا للسنة دي في كل مشروعات ومجالات التنمية اللي بتدعمها مؤسسة مصر الخير.


موقع مصر الخير غير مسؤل عن محتوى التعليقات

إشتراك في النشرة الإخبارية