كتير بنسمع عن مشكلة المياه في مصر، وإنه فيه ناس كتير مش متوفر لها الوصول لمصدر مياه نظيفة في بيوتها، أو في المنطقة أو القرية كلها الي ساكنة فيها.
لكن محدش فينا يعرف أد إيه المشكلة دي كبيرة ومحتاجة جهود من كل واحد فينا في حلها عشان يبقا فيه مياه نظيفة متوفرة لكل واحد في مصر.

هنتعرف على أرقام وإحصائيات عامة عن المياه في مصر توضحلنا حجم المشكلة وهتساهم في إيجاد حلول ليها:

1- 7.5 مليون مصري ماعندهمش مياه نظيفة في بيوتهم، وأكتر من مليون طفل محرومين من خدمات الصرف الصحي.
الرقم كبير وبيؤثر بالتالي على مستوى النظافة الشخصية لكل واحد، وبالتالي على أهله وأولاده وحمايتهم من الأمراض وغيرها كتير من حاجات بتقوم على وجود المياه في الأساس في حياتنا.

2- 6% بس من قرى مصر اللي فيها خدمات صرف صحي.

وجود خدمات صرف صحي متكاملة مش شئ سهل الحصول عليه.. وكمان ممكن يكون نظام الصرف الصحي في البيت قديم ومتهالك وبيوصل مياه لكن مش صالحة للشرب.

3- 21.8% بس من البيوت في صعيد مصر فيها دورات مياه مناسبة.

دورات المياه النضيفة من الأساسيات في كل بيت للمحافظة على نضافة البيت ككل.. لكن فيه كتير من الأهالي في قرى مصر بتروح مشاوير مخصوص عشان تلاقي دورة مياه مناسبة.. ممكن تكون في المسجد أو أي مكان تاني قريب في المنطقة.

4- أكتر من 6.5 مليون مصري بيعانوا من انقطاع المياه يومياً.

انقطاع المياه واحدة من المشاكل الي بتواجه نسبة كبيرة من المصريين.. والنسبة الأكبر مننا في مصر اتعرضت لقطع المياه بنفسها.. وكلنا عارفين أد إيه بيكون يوم صعب في كل حاجة بداية من إنك تاخد دش الصبح أو تتوضى أو تستعمل المياه لتحضير الأكل وغيرها كتير من استخدامات المياه اليومية.

5- 3000 طفل أقل من خمس سنوات بيموت كل سنة بمرض الإسهال بسبب المياه الملوثة وعدم الاهتمام بالنظافة الشخصية.

مشكلة المياه كمان بتتسبب ساعات في وفاة أطفال بسبب مرضهم! وده بسبب مرض سهل علاجه زي الإسهال.. لكن المشكلة هنا بتكون في المياه الملوثة الي بتستخدم لنظافة الأطفال والي صعب يكون لها بديل في كتير من القرى في مصر.

الأرقام دي بتوضح أد إيه كل مساهمة ومشاركة مني ومنك هتفرق كتير.
ممكن تساهم بحاجات بسيطة زي إنك توفّر في استخدام المياه في حياتك اليومية، أو ممكن تشارك كمان في حملتنا في مصر الخير اللي قررنا نبدأ في قرى الصعيد، وتحديداً هتكون محافظة سوهاج هي المستهدفة في المرحلة الأولى عشان نقدر نوصل تبرعاتكوا ومساهماتكوا للقضاء تماماً من خلالها على مشكلة المياه بإذن الله.

تقدر تشاركنا في حملة #بالمياه_ليها_معنى من خلال وصلات مياه منزلية أو المشاركة في مشروعنا الأكبر لإنشاء نظام متكامل للمياه في قرى بني حميل، والعوكلية، والسمطا في محافظة سوهاج.

* جميع الأرقام المذكورة طبقاً لإحصائيات منظمة اليونيسف مصر للعام 2016.


موقع مصر الخير غير مسؤل عن محتوى التعليقات

إشتراك في النشرة الإخبارية
أبدي إعجابك على الفيسبوك
-->