كل سنة في يوم 5 سبتمبر.. العالم بيحتفل باليوم الدولي للعمل الخيري، واحنا في مؤسسة مصر الخير وباعتبار التطوع جزء أساسي من شغلنا.. وما بيكملش إلا بيه، بنشجع نشر فكرة التطوع للعمل الخيري وده على كل المستويات.. سواء إنت كفرد تقدر تغيّر في اللي حواليك.. أو كمجموعة تقدر تشارك بشكل أكبر.. أو التغيير الأكبر على مستوى المجتمع كله.

بنشارك معاكوا قصة متطوعة من متطوعين مؤسسة مصر الخير.. اسمها ريم، عندها 16 سنة.. بدأت رحلتها في التطوع معانا من أكتر من سنة، وكانت في حملة رمضان 2016.

بدايتها معانا كانت علشان عندها وقت وطاقة تقدر تستغلهم في مساعدة الناس، وإنها مش بس تحقق أهداف كلنا نفسنا فيها زي النجاح أو الوصول لوظيفة معينة.. لأ كان حلمها تقدر تحقق أحلام غيرها.

بدأت ريم في العمل الخيري من حملة رمضان 2016 مع مؤسسة مصر الخير.. شاركت في تعبئة كراتين رمضان وشنط إفطار المسافر. بدأت تحس من البداية بإن كل كرتونة بتوصل لأسرة وبتساعدهم، وكل شنطة بتوصل لحد محتاجها بجد.. وأد إيه الموضوع على بساطته وعلى الساعات اللي بتقضيها فيه بيوصّل خير كتير ولعدد كبير من الناس.

استمرت بعد كده على مدار السنة في حملات تانية زي حملات التبرع بالدم، وحملات القوافل الطبية.. وكمان حملة قد الشتا في يناير اللي فات.. دورها ماكانش بس بيتوقف عند إنها تنزل بنفسها تشارك.. لأ كمان كانت بتعتبر مهتمها إنها توصل لمتطوعين أكتر وتكلمهم عن مؤسسة مصر الخير وأد إيه العمل الخيري يقدر يغيّر كتير.

وبدأت ريم تبقى حلقة وصل أساسية مع كل حد عايز يتطوع ويساهم بوقته.. ووصلت بكده لأكتر من 200 متطوع قدروا يشاركوا في حملات مؤسسة مصر الخير على مدار السنة. فمش بس مجهود ريم لوحدها.. لأ اتضاف له أكتر بكتير مما كانت هي نفسها متخيلة.

وفيه بعد تاني للعمل الخيري.. وبيظهر على مستوى إنساني في المتطوع نفسه، وهو التغيير اللي بيحس بيه والرضا النفسي عن اللي بيقدمه وريم قالت إن التطوع فرق في شخصيتها فهي كانت خجولة وكانت بتسعى دايماً لتنظيم وقتها وتطوير قدراتها الشخصية.. والتطوع ساعدها جداً وفي وقت قصير إنها تتخلص من الخجل.. وتزود ثقتها في نفسها وتقدر تتحمل المسئولية وكمان إنها كانت بتقدر تنظم وقتها بين المدرسة والتطوع وحياتها الشخصية والترفيهية.

ريم شاركت بأكتر من 1500 ساعة تطوع مع مؤسسة مصر الخير.. تقدر تشارك معانا وتبدأ قصة نجاحك في العمل الخيري مع مصر الخير دلوقتي من هنا، أو لو انت بتشتغل مع مجموعة أو كيان يقدر يتطوع مع مؤسسة مصر الخير ممكن تقدم من هنا.


موقع مصر الخير غير مسؤل عن محتوى التعليقات

إشتراك في النشرة الإخبارية