قصة نجاح جديدة حقق أصحابها إنجازات على مستوى عالمي وممتاز من أبطالنا من ذوي الإعاقة.

مروة سامي وشيماء يحيى من فريق أوركسترا النور والأمل.. وده أحد أهم المشروعات الفنية لذوي الإعاقة في مصر، واللي بيقوم عليه فتيات كفيفات وبيعزفوا مقطوعات عالمية وكلاسيكية وقدم عروض كتير في أكتر من 20 دولة في العالم منهم دول عربية وكمان أوروبية.

وكان ليه نصيب كبير من مشاركة مؤسسة مصر الخير في معرض الصناعات اليدوية الشهر اللي فات.. وقام بتقديم عرض افتتاح المعرض بشكل أكتر من ممتاز.

مروة سامي انضمت لأوركسترا النور والأمل السنة اللي فاتت.. بدأت قصتها من وهي عندها 8 سنين لما بدأت تدرس آلة الفيولين في معهد النور والأمل، وبعد كده في ثانوي درست في معهد الكونسرفاتوار.. عشان تقدر بعد كده تشارك في حفلات كتير في دار الأوبرا وساقية الصاوي وأماكن تانية كتير. مروة كمان مذيعة في برنامج الموسيقى في اتحاد الإذاعة والتليفزيون، وبتشارك في الاحتفالات والمراسم الرسمية في الفرقة الوترية.

أما شيماء يحيى.. فمن صغرها وهي متفوقة في الدراسة، وبدأت تتعلم طريقة برايل وهي عندها سبع سنين، وكانت بتشارك دايماً في الأنشطة المدرسية المختلفة زي الموسيقى والصحافة والإذاعة والمشاركة في الأبحاث العلمية.

وبعد ما طلعت الأولى على المحافظة في ثانوية عامة، اشتغلت مدرسة في مدرسة النور والأمل. وبجانب ده بدأت تهتم بالموسيقى في المدرسة وتتعلم إزاي تقرا النوتة الموسيقية وإزاي تبدأ تعزف على الكمان.

وخلال فترة قصيرة بدأت تشارك في الأوركسترا لحد ما بدأت في أول حفلة كبيرة ليها في حياتها لما سافرت كندا، وكانت الحفلة في أكبر مسرح هناك.. وتفاعل الجمهور كان فوق توقعات شيماء وفريق الأوركسترا كله.. وسافرت بعد كده حفلات كتير لأماكن كتير زي ألمانيا، وفرنسا، وأستراليا، والهند، وغيرها.


موقع مصر الخير غير مسؤل عن محتوى التعليقات

إشتراك في النشرة الإخبارية
أبدي إعجابك على الفيسبوك
-->